Deu 2 | NdeIBE | STEP | Sasesiphenduka siqonda enkangala ngendlela yoLwandle oluBomvu njengokulaywa kwami nguJehova. Okwesikhathi eside sasilokhu sibhoda ezweni lamaqaqa aseSeyiri.

Deuteronomy 2

Ukuntula enkangala

1 Sasesiphenduka siqonda enkangala ngendlela yoLwandle oluBomvu njengokulaywa kwami nguJehova. Okwesikhathi eside sasilokhu sibhoda ezweni lamaqaqa aseSeyiri.

2 UJehova wasesithi kimi, 3 “Selibhode labhoda ezweni lamaqaqa sekwanele; khathesi phendukani likhangele enyakatho. 4 Nika abantu leziziqondiso: “Khathesi selizakwedlula elizweni labafowenu isizukulwane sika-Esawu, abahlala eSeyiri. Bazalesaba, kodwa libolimuka linanzelele. 5 Lingaboqala livuse impi ngoba angiyikulipha ilizwe labo, sengisitsho lesiqinti esilingana unyawo olulodwa. Nganika u-Esawu ilizwe laseSeyiri elamaqaqa ukuthi libe ngelakhe. 6 Lizababhadala ngesiliva libhadalela ukudla elizakudla lamanzi elizawanatha.”

7 UJehova uNkulunkulu wenu uyibusisile imisebenzi yezandla zenu. Ulikhokhele kulo lonke uhambo lwenu phakathi kwenkangala enkulu kangaka. Iminyaka engamatshumi amane uJehova wenu ube lani, alizange liswele lutho.

8 Ngakho sahamba sedlula kubafowethu isizukulwane sika-Esawu abahlala eSeyiri. Saphenduka sisuka emgwaqweni wase-Arabha ukhwela usuka e-Elathi le-Eziyoni Gebha, sahamba ngomgwaqo wenkangala yaseMowabi.

9 UJehova wasesithi kimi, “Lingahlukuluzi amaMowabi loba ukubavusela impi, ngoba angiyikulinika ngitsho lesiqintshana selizwe labo. Senginike ele-Ari isizukulwane sikaLothi kube yisabelo sabo.”

10 (Ama-Emi ake ahlala khonapho – abantu abalamandla njalo abanengi, futhi bade njengama-Anakhi. 11 Labo njengama-Anakhi babebalwa njengamaRefa, kodwa amaMowabi ayebabiza ngokuthi ngama-Emi. 12 AmaHori ayekade ehlala eSeyiri, kodwa adudulwa yisizukulwane sika-Esawu. Babhubhisa amaHori ayelapho basebesakha endaweni yawo, njengalokho okwenziwa ngabako-Israyeli ezweni abaliphiwa nguJehova ukuba libe yisabelo sabo.)

13 UJehova wasesithi, “Khathesi sukani lichaphe isiHotsha saseZeredi.” Ngakho sachapha isihotsha.

14 Kwedlula iminyaka engamatshumi amathathu laficamibili sisuke eKhadeshi Bhaneya sisiyachapha isiHotsha saseZeredi. Ngalesosikhathi, amadoda ebutho alesosizukulwane ayesebhubhile, njengokufungelwa kwabo nguJehova. 15 UJehova wamelana labo waze wababhubhisa bonke ezihonqweni.

16 Kwathi-ke sekufe labo abokucina kula amadoda ebutho, 17 uJehova wathi kimi,

18 “Lamuhla uzakwedlula emangweni waseMowabi ngase-Ari. 19 Ekufikeni kwakho kuma-Amoni, ungawahlukuluzi loba ukuwavusela impi, ngoba angiyikukunika loba yiliphi ilizwe lama-Amoni. Ngilinike lesisizukulwane sikaLothi kube yisabelo sabo.”

20 (Leli lalo laliphathwa njengelizwe lamaRefa ayehlala khonapho; kodwa ama-Amoni ayebabiza ngokuthi ngamaZamzumu.

21 Babengabantu abalamandla bebanengi, njalo bebade njengama-Anakhi. UJehova wababhubhisa phambi kwama-Amoni, wona abadudulayo njalo ahlala endaweni yabo.

22 UJehova wayenze njalo esizukulwaneni sika-Esawu, esasiseSeyiri, ekubhubhiseni kwakhe amaHori phambi kwabo. Babadudula basebehlala endaweni yabo kuze kube lamuhla.

23 Kanti-ke okunjengama-Avi ayehlala emizini ekhatshana njengeGaza, amaKhafithori ayevela eKhafithori ababhubhisa asehlala endaweni yabo.)

Ukwehlulwa kukaSihoni inkosi yaseHeshibhoni

24 “Suka khathesi uchaphe uDonga lwase-Anoni. Uyabona, senginikele esandleni sakho uSihoni um-Amori inkosi yaseHeshibhoni kanye lelizwe lakhe. Qalisa ukuthatha lelilizwe ulwe impi laye. 25 Kusukela lamuhla ngizaqalisa ukuthelela izizwe zonke ngaphansi kwezulu ukukwesaba. Zizakuzwa indumela yakho zethuke zesabe zicunuke ngenxa yakho.”

26 Kusukela enkangala yaseKhedemothi ngathumela izithunywa kuSihoni inkosi yaseHeshibhoni ngisithi akubekhona ukuthula njalo ngisithi, 27 “Sivumele sidabule elizweni lakho. Sizahamba ngomgwaqo omkhulu kuphela asiyikuphambukela ngakwesokudla loba ngakwesenxele. 28 Sithengisele ukudla lamanzi okunatha ngentengo yesiliva. Sivumele nje sedlule ngezinyawo – 29 njengezizukulwane zika-Esawu ezihlala eSeyiri, kanye lamaMowabi ahlala e-Ari, asenzela khona – size sichaphe uJodani singene elizweni uJehova uNkulunkulu wethu asinika lona.” 30 Kodwa uSihoni inkosi yaseHeshibhoni wala ukuthi sedlule. Ngoba uJehova wenu wayemenze waqholoza inhliziyo yakhe yaba lukhuni ukuze amnikele ezandleni zenu, njengoba esekwenzile khathesi.

31 UJehova wathi kimi, “Khangela, sengiqalisile ukunikela uSihoni lelizwe lakhe kuwe. Qalisa khathesi ukunqoba uthathe ilizwe lakhe.”

32 Kwathi uSihoni ephuma lebutho lakhe ukusihlangabeza ekuhlaseleni eJahazi,

33 uJehova wethu wamnikela kithi sambulala, yena kanye lamadodana akhe lebutho lakhe lonke. 34 Ngalesosikhathi sathatha amadolobho akhe sawabhidliza – amadoda, abesifazana kanye labantwana. Kakho owasilayo. 35 Kodwa izifuyo lakho konke esakuthumbayo emadolobheni esawanqobayo sazithathela khona.

36 Kusukela e-Aroweni emakhunjini oDonga lwase-Anoni, kanye lokusuka edolobheni elisedongeni, kusiya khonale eGileyadi, akuladolobho elalingamelana lathi. UJehova uNkulunkulu wethu wawanikela wonke kithi.

37 Kodwa kusiya ngokulaya kukaJehova uNkulunkulu wethu, alizange lingene elizweni lama-Amoni, kumbe elizweni elisemingceleni yomfula uJabhoki loba lelo elilamadolobho asemaqaqeni.